Hakuna jambo gumu kama kutamka bendi fulani imekufa. Naam ni ngumu kwasababu zinaweza kuwa zimekufa hadharani lakini bado zikawa hai BASATA.

Bendi zote zinasajiliwa Baraza la Sanaa la Taifa (BASATA) na zinalipa ada ya kila mwaka na huo ndio ‘uhai’ halisi wa bendi.

Bendi inaweza kukaa hata miaka mitano bila maonyesho, lakini bado BASATA ikatambua uwepo wake kwa kuwa ni mwanachama hai.

Kama soko letu la muziki lingekuwa zuri na limerasimishwa kisasa, basi bado bendi ingeweza kuingiza kipato kikubwa bila hata kufanya onyesho lolote kwa mwaka mzima – mauzo ya nyimbo yangetosha kuleta neema.

Lakini kwa hali ilivyo na kwa namna soko letu lilivyo, mashabiki wengi tunatambua uhai wa bendi kutokana na maonyesho yao ya kila wiki, kinyume na hapo huwa tunaamini hiyo ni bendi mfu.

Hakuna mmiliki anayekuwa tayari kukiri kuwa bendi imekufa, siku zote watakuambia aidha bendi ipo kambini au imesimamisha maonyesho kwa muda mfupi.


Kwao kusema bendi imekufa ni ‘uchuro’. Mfano mzuri ni bendi kubwa za Akudo Impact na Mashujaa Band. Moja ipo kambini tangu Januari na moja imesimamisha maonyesho ikisubiri vyombo vipya na haijafanya onyesho lolote la maana mwaka huu huku kila mwanamziki akiwa anahaha kutafuta ugali wake kwenye bendi zingine.

Kutokana na umakini wa wamiliki wa bendi hizi, usomi wao na pengine hata uwezo wao wa kiuchumi, nalazimika kukubali kuwa bendi hizi hazijafa, lakini nashawishika kuamini kuwa zipo mahututi hospitalini zikihitaji kubadilishiwa damu au figo.

Naam bendi hizi zinahitaji kubadilishwa damu bila hivyo zitakufa kufa kweli. Damu ya bendi hizi ni chafu na zimejaa virusi ambavyo ni hatari kwa uhai bendi.

Nachelea kusema wamiliki wa bendi hizi ni ‘virusi’ kwa vile labda bado ni mapema mno kusema hivyo, lakini sihofii kusema baadhi ya wanamuziki na baadhi ya viongozi wa bendi hizi ni virusi vilivyosambaa kwenye damu ya bendi na namna pekee ni kubadilisha damu.

Kama kiongozi wa bendi anakubali bendi isimamishe maonyesho kwasababu ya uchakavu wa vyombo wakati kuna bendi kibao zinaishi kwa vyombo vya kukuodi, basi kiongozi huyo ni kirusi. Mmiliki aliyekubali hatua hiyo naye anapaswa kuchunguzwa pengine naye ni kirusi.

Kama kuna kiongozi anatengeneza mipango ya bendi kukaa kambini kwa nusu mwaka bila onyesho lolote, bila kujali wanamuziki wanaishi vipi, kiongozi huyo ni kirusi.

Kama wanamuziki wanakaa kwenye bendi kwa zaidi ya mwaka mzima bila kutoa wimbo mmoja utakaoteka soko, huku wateja wakiendelea kuyeyuka kwenye show zao, basi wanamuziki hao ni virusi. Kama wamiliki wanashindwa kusimamia hilo, kama wanashindwa kuifanya bendi iwe na japo video moja kali kwa mwaka, basi wamiliki nao ni virusi.

Na hapo ndipo ninaposema kuwa japo bendi hizi mbili hazijafa, lakini zipo chumba cha wangonjwa mahututi, nyingine ikihitaji kubadilishiwa damu, nyingine ikihitaji kubadilishiwa figo …kuna mstari mwembamba sana kati ya uhai na kifo kwa bendi hizi.

Zipo bendi nyingi sana kwenye dansi na taarab ambazo zipo kwenye hali hiyo, lakini nimelazimika kuzitaja Akudo na Mashujaa kwa kuwa hakuna ubishi kuwa zilifanya makubwa kwenye muziki wa dansi, ni hasara kwa jamii ya wapenda muziki iwapo bendi hizi zitapotea.
NENDA PLAY STORE KUPITIA SMART PHONE YAKO KISHA DOWNLOAD APP YETU YA "SALUTI5">>>> BONYEZA HAPA
LIKE PAGE YETU YA FACEBOOK Saluti5

Post a Comment

 
Top
Nicolaus Trac